43
Magna cum voluptate curiosos Macularum solis, Tabulis III et IV extra dissertationis nostrae fines additis, etiam nonnullarum participes facimus diligentius pictarum imaginum. Nam ipse Vir Illustrissimus a Soemmerring quadram suam lapidis calcarii nobis tradidit ad eas imagines multiplicandas, quarum in decreto Societatis Senckenbergiae (vide supra p. 9) mentio facta est. Vides eas L. B. in tabula III. Tabulae IV ipsum Viri Illustrissimi nomen, ut pictoris, subscripsimus, ne dubium esset, quin, ut fere liberi patri dono dare res ipsius solent die natali, ita nos illi ad festum diem celebrandum sua donaremus. Exhibet autem haec tabula duas Maculas quotidie, alteram a 5 Oct. usque ad 18 Oct., alteram a 18 Oct. usque ad 31 Oct., diligenter observatas. Illa est Macula quartae periodi, inter gradum Longitudinis 270 et 290 et inter gradum Latitudinis borealis 20 et 30; haec quintae periodi, inter gradum Longitudinis 80 et 100 atque Latitudinis borealis 10 et 30 sita. Illa in imaginem communem (Tab. A.) translata est ex diario 10 Oct., haec ex diario 20 Oct. In quo diario invenimus notam, observatorem 12, 13 et 14 Oct. situm non descripsisse. Si veram hujus notae vim in tempore intellexissemus, aliam magis conspicuam illius Maculae imaginem transtulissemus.