De sectione horizontali capitis humani secundum axes
oculorum instituta.
(yapnt puellae Tyroliensis viginti circiter annorum, admodum, venustae* coma nigerrima, oculisque grandibus badiis conspicuae, brevi morbo peremtae, ad partium omnium habitum normalem demonstrandum, quam maxime idoneum obtinere contigit. Ad sectionem autem ejus secundum axes visorios rite instituendam, situm oculorum vivorum naturalem et maxime tranquillum elegi, qualis nimirum capite erecto axibus visoriis ad objectum in horizonte eis oppositum directis perfecte inter se parallelis atque in uno eodemque plano fere horizontali positis animadvertitur; palpebra vero superior clausa ad structuram ejus melius demostrandam. Arteriis venisque capitis hujus cera colorata artificiose repletis, partes omnes, plano illo horizontali per axes oculorum ducto et per chiasma nervorum opticorum continuato supra positas, partim serra, partim cultro paullatim amovi, partes inferiores, quantum fieri poterat, in situ naturali conservando.
Ut autem in imagine capitis, tali modo parati, quoad possem, veritatem assequerer, primas lineas in tabulam vitream duxi, recenti secturae perfecte planae impositam, quibus inde in chartam translatis, in icone exaranda et perficienda adjutore usus sum harum rerum peritissimo artifice, Christiano Koeck.
Externarum partium dimensiones, cranii formam et convexitatem, oculorum magnitudinem et distantiam ab invicem cum Sapphus capite, quod ferunt, optime congruentes inveni; faciem elegantiae causa minus coarctatam repraesentavi, quam secundum optices regulas apparere debuerat, ad Yesalh vel pictoris ejus, Titiani, potius exemplum.
Bulbos oculorum utpote femineos permagnos, virilibus tamen in toto paullo minores, tunicisque subtilioribus praeditos esse reperies.
Quod vero in sectione nostra horizontali per nervorum opticorum insertiones ducta hemisphaeria oculorum inferiora hemisphaeriis superioribus paullo minora eorumque etiam axes visoriae paullo breviores inde appareant, vix, ac ne vix quidem, poteris animadvertere.