LEGES ANATOMIAE
IN PRAEPARATORIO S. PROSECTORIO AFFIGENDAE
JULIO 1770.
1) Memento, qui admittitur vel medicus vel chirurgus, vel obstetrix finis salutaris, serviendi animae corporisve proximi commodis tam in avertendis quam profligandis morbis, qui pietatem, attentionem sedulam, diligentiamque requirit, nam et hic Deus praesens est, sine cujus Numine nihil boni, sapientia nulla.
2) Hinc cavebit, quisquis adest, nuditate corporum abuti ad excitandos et sibi et aliis perversos voluptatis ignes, ni poenas dare lasciviae velit suae, abigique ex societate discentium spectantiumque. Praesector hic rigidus observator honesti esto, nec in re seria nugas admittito.
3) Inferre manus violentas, sordidasque, cultros etc. muris, mensis, scamnis, caveto, cui discere curae cordique est ne molesta correctione vitio huic mederi sit opus.
4) Munditiei studento et docentes et discentes, ne et suae et aliorum sanitati officiant, cum labor hic sua natura sordes afferat, ex quibus colligere sanitatis praesidia solidamque doctrinam necesse est, et entia hic multiplicare praeter necessitatem turpe fuerit.
5) Inter demonstrationes anatomicas exactum servetur silentium, ut et Pro-
f"—-'
ponens et audiens fine suo potiantur, quid est audiri et audire, prodesse et proficere.
6) In sectionibus alter alterum studeat sublevare, erudire candide ingenue, nec ullatenus vel ambitioni vel invidiae locus fiat; salus enim commodumque publicum suprema lex esto, quae et hic coepta omnia moderatur.
7) Viva animalia ad demonstranda post pastum vasa lactea, nunquam secantur meo in Amphitheatro. Barbarum crudele et non honestum docendi genus hoc est. Veto hoc, homo, qui omni ope semper nisus fui, ne homini, aut ulli creatorum Dei gravis ac nocius essem, laedere neminem unquam ausus fui, potius omnibus, vel et brutis bona exhibere, quae commodo nostro data a Deo nataque sunt, non ut cruciatibus a nobis afficiantur contra Evangelium Christi, cuius finis amor est in creata omnia.
8) Iudiciales sectiones meo in Amphitheatro, quod primum est in urbe patria, locum habento, ad normam conventionis, quae inter Xenodochium peregrinorum et meam fundationem civicam medicamque fiat.